Апаслылар тагын җиңде

Апас район хастаханәсенең 8 яшь белгече «Яшь белгечләр килә алмашка» Татарстан телевизион конкурсында бик уңышлы чыгыш ясап, җиңүчеләр булып кайтты. Бу чара Казанның зур сәхнәләрендә 3-5 октябрьдә барды. Башкаланың «Санта» санаториясендә сайлап алу турында апаслылар финалга үтте һәм иң көчле 14 команда арасына керде. 5 октябрьдә Апас районы яшь табибларының «Сәләмәтлек агачы» җыелма командасы Казанның Химиклар сараенда узган Гала-концертта катнашу хокукын яулады һәм барлык номинацияләрдә дә җиңеп, 2-3 урыннар яулады. Узган ел шундый ук конкурста Апас данын «Зөя» агрофирмасы яшь белгечләре командасы яклаган иде. Алар да финалга үтеп, былтыр районга күпсанлы бүләкләр һәм Дипломнар алып кайттылар.