Компьютерга сыерның гомер юлын язалар

Дәүләки фермасында быелгы яз шактый үзенчәлекле һәм яңалыкларга бай. Район инвесторы һәм Казан галим-белгечләре биредә сыерларны ясалма каплату технологиясенең иң заманчасын сынап карарга булдылар. Иң беренче эш итеп барлык савым сыерларының да мәгълүматлары компьютер базасына кертелде. Аерым торакка куелган сыерларны көнгә 3 тапкыр саву алымы да кулланыла. Ясалма каплату 2-3 этапта үткәрелә һәм аның нәтиҗәлелеге УЗИ аппараты белән тикшерелә.

-Технология буенча ректаль тикшерү ысулы да кулланылачак. Сыерларның тоякларын чистарту-пөхтәләү дә яңача үткәрелә безнең фермада,-ди мөдир Дания Закирова.

-Анысын Апас ветеринария берләшмәсе белгечләре башкара. Безнең терлекчеләр аларга ярдәм итә,-ди "Зөя" агрофирмасының Горбунов исемендәге берләшмәсе мал табибы Фәрит Насыйбуллин.

Биредә эшләүче алдынгы сыер савучы Рафия Фәйзуллина, терлекчеләр Геннадий Колсанов белән Ринат Галимов түземсезлек белән терлекләрнең җәйләүгә чыгуын көтә.

-Бүген Горбунов исемендәге берләшмә фермаларында бер сыердан көнгә уртача 15 килограмм сөт савып алына. Бу-узган елгы дәрәҗәдән сизелерлек артык,-дип белдерә агрофирманының бу яктагы берләшмәсе зоотехнигы Илсур Хәсәнов.-Яңа эш алымнарына шикләнерәк карыйбыз анысы. Тик һаман искечә генә дә яшәргә ярамаганын яхшы аңлыйбыз. Тормыш бит ул һаман бер урында гына тормый...

-Җәен дә фермаларыбыз буш булмаячак, әлбәттә,-диләр дәүләкилеләр.-Чиратта-кардаларны чистарту, торакларны төзекләндерү. Сенаж-силос базларын да кышлык азык әзерләүгә иртә яздан көйләп кую бер дә артык булмас. Зур сөт чишмәсе башы менә шуларның бөтенесен алдан күреп башкаруда бит ул.

Ришат Җамалиев.