Полиция кыш бабае бүләк тарата

Республикада 23 декабрьдән 10 январьга кадәр үткәрелүче "Полиция кыш бабае" акциясе кысаларында район эчке эшләр бүлеге социаль яклау идарәсе белән берлектә аз керемле гаилә балаларына һәм исәптә торучы балаларга яңа ел бүләкләре таратуны оештырды. Полиция, социаль яклау идарәсе хезмәткәрләре Кыш бабай, Кар кызы, әкият геройлары киемнәренә киенеп, бу гаиләләрнең барысында да булырга тырыштылар. Һәрбер баланы Яңа ел белән котлап, бүләк биреп шатландырдылар. Балалар да, үз чиратында, матур итеп шигырьләр сөйләделәр, җырладылар, теләкләрен әйттеләр. Районыбызда шундый 29 гаиләдә 54 бала тәрбияләнә икән. Бу гаилә балаларына ярдәм итеп, Яңа ел бүләге тапшырырга теләге булган кешеләр полиция бүлегенә мөрәҗәгать итәргә мөмкиннәр, ә полиция хезмәткәрләре, кичекмәстән, бүләкләрне ияләренә тапшырачаклар.