Апас балалары ришвәтчелеккә каршы

    (22 август, “Апастово-информ”).

   Район хакимияте каршы балаларның шатлыклы авазларыннан гөр килеп торды. Биредә балалар арасында рәсем бәйгесе узды. Бәйге “Коррупциягә – юк, дип әйтик” темасына багышланган иде.

  Рәсемнәрдә балалар намуслы, тату тормыш иткәндә, бер-береңә хөрмәт белән караганда, гадел һәм мәрхәмәтле булганда гына бәхетле киләчәк төзергә мөмкинлеген чагылдырырга тырыштылар.


 “Чара балалар өчен бик күңелле дә, файдалы да узды. Ришвәтчелекнең җәмгыятькә зур зыян салуын яшьтән белеп, аңлап үсүләре сөендерә”, - диде район башкарма комитеты җитәкчесе урынбасары Гөлүсә Галләмова.

  Балаларның рәсемнәре барысы да игътибарга лаек иде. Һәр балага Рәхмәт хатлары һәм истәлекле бүләкләре тапшырылды. Шулай ук балалар белән әңгәмә дә узды, алар белән ришвәтчелек хакында сөйләшеп, фикерләрен дә тыңладылар.