Багышта Коръән бәйгесе

28 мартта Багыш авылында Урта Балтай, Югары Балтай, Кече Бакырчы, Олы Бакырчы, Тәүгелде, Чирмешән, Багыш, Аюкөйдергән авылларыннан мәчет каршында укып йөрүче балалар һәм өлкәннәр өчен Коръән укучылар бәйгесе уздырылды.

Бәйге дүрт төрле юнәлештә үтте. Бәйгенең беренче өлеше һәр авылдан, төрле яшьтәге, мәктәптә укучы 11 бала катнашында азан әйтү белән башланып китте. Икенчесе - беренче ел укып йөрүче балаларның Коръәннең ачкычы булып торучы "Әл-Фатиха " сүрәсен һәм " Әл-Ихлас" сүрәләрен яттан сөйләп, Мөгаллим Сәни китабыннан аерым сүзләрне укып күрсәтү булды. Ә өченче өлеше исә - икенче ел мәчеткә йөреп укучы балаларның яттан, үзләренең теләге буенча, Коръәннән 2 кыска сүрәне һәм шулай Мөгәллим Сәни китабыннан быелгысы уку елында үткән программа нигезендә аерым сүзләрне укудан гыйбарәт булды.

Бәйгенең балалар катнашындагы өлеше тәмамлануга Багыш авылы уңганнары балаларның барысын да өстәл артына чакырып тәмле ризыклар белән сыйладылар.

Дүртенче өлеше өлкәннәр өчен булды. Алар Коръәннең теләсә кайсы битен ачып укып, укыган өлешенә тәҗвид кагыйдәсе нигезендә аңлатма биреп, һәм яттан озынрак берәр сүрәне сөйләп бирделәр. Алар бу гамәлләренә бик җитди карап, зур дулкынлану белән башкарып чыктылар. Биредә төрле авылдан 7 мөслимәбез көч сынашты, ә без исә Әлһәмдүлилләһи шөкер, бу төбәктә тагы 7 укытучы өлгереп килә дип сөенеп утырдык.

Бәйгедә барысы 28 бала, 7 өлкән мөслимәбез катнашты. Жюри әгъзалары бәйге ахырында һәр юнәлештән беренче урынга лаеклыларны билгеләп, 4 кешегә бүләкләр тапшырды, шулай ук бәйгедә катнашучыларның барысы да истәлекле бүләкләр белән бүләкләнде. Шәкертләрен шушы бәйгегә әзерләүче мөгәллимәләребез дә ихтибардан читтә калмады, аларга да истәлекле бүләкләр тапшырылды, - ә алар моңа бик тә лаеклы.

Бәйге зур хәзерлек белән, бик оешкан төстә башкарылды. Шушы бәйгене оештыручы мәчет имамнарына, мөслимәләр берлеге әгъзаларына, мөгәллимәләребезгә, табын әзерләүдә булышлык күрсәткән авыл халкына олы рәхмәтләребезне белдерәбез, изге эшләре дәвамлы булсын, һәммәсе дә олы дәрәҗәләргә ирешеп, сау-саләмәт булып гомер итсеннәр.

Тәүгелде авылыннан бәйрәмгә килүче абыстаебыз, Югары Балтай авылыннан Тәүгелдегә йөреп укытучы Зөһрә Сафинага аерым олы рәхмәтләрен белдерде.

Балтай - изге күңелле зөһрәләргә бик бай, Балтайлыларның тирә-як авылларга йөреп дин гыйлемен өйрәтүләре күркәм традиция булып тора дип әйтсәм дә ялгышмам, алар бу гамәлне үзләренең изге бурычлары кебек кабул итеп, бик теләп башкаралар, ә бу районыбыз өчен зур горурлык, барыбыз өчен дә олы үрнәк.

Аларның һәммәсенә олы рәхмәтләребезне юллыйк, изге эшләре дәвамлы булсын, гаиләләрендә иминлек, үзләре саулыкка коенып гомер итсеннәр.