Апастово-информ
  • Рус Тат
  • Илнара һәм Динара Хәйбуллиналар

    Кич җиттеме ай, күзләрен кысып, тыныч йокы тели. Ә иртәсен кояш, хәерле иртә теләп, битләремнән сыйпый. Әйе, дөрестән дә "берсе-ай, берсе-кояш" булган игезәк кызларым тыныч йокы теләп йоклаталар, ә иртәләрен хәерле иртәләр теләп йокыдан уяталар. Хатын- кыз өчен ана булудан да зур бәхет юктыр, мөгаен. Ул яктан мин бик бәхетле....

    Кич җиттеме ай, күзләрен кысып, тыныч йокы тели. Ә иртәсен кояш, хәерле иртә теләп, битләремнән сыйпый. Әйе, дөрестән дә "берсе-ай, берсе-кояш" булган игезәк кызларым тыныч йокы теләп йоклаталар, ә иртәләрен хәерле иртәләр теләп йокыдан уяталар.

    Хатын- кыз өчен ана булудан да зур бәхет юктыр, мөгаен. Ул яктан мин бик бәхетле. Минем 3 кызым үсеп килә.

    Беренче тапкыр йөккә узып, шифаханәгә теркәлергә баргач ук, "игезәкләр" диделәр. Ул вакытта мине ниндидер дулкынлану хисе биләп алды... Шатлыктан көләргәме, әллә еларгамы? Күңелдәге кичрешләрне сүз белән генә аңлатып бетереп булмый.

    Якыннарым ышанмады. Чөнки әлегә кадәр нәселебездә игезәкләр булганы юк иде. Шулай да иремнең әтисе ягыннан нәселләрендә игезәк балалар булуы ачыкланды.

    Казан шәһәрендә узган УЗИ карынымдагы балаларның кызлар булуын күрсәтте.

    2005нче елның 6нчы июлендә 12 сәгать 10 минутта Илнарабыз, ә тагын 3 минуттан Динарабыз туды.

    Кызлар бик тере иделәр, 4 айдан беренче тешләре чыкты, 10 айдан тәпи дә киттеләр, бик иртә телләре ачылды. Кечкенәдән оста итеп яттан шигырьләр сөйли башладылар. Алар шундый хәрәкәтчәннәр иде, күрше апа, 1,5- 2 яшьлек кызларның кресло өстеннән сикерүләрен күреп, "сезнең йөрәгегез икедер" дия иде.

    Берсенең ашыйсы килсә, икенчесенең дә ашыйсы килә, берсе йокласа, икенчесе йоклый, берсе уянса, икенчесен елап, яки кычкырып булса да уята иде. Бер үк төрле уенчыклар белән уйнадылар. Кунакларга, бәйрәмнәргә, кичәләргә бер үк төрле кием кияргә, бер үк төрле прическалар ясарга яраталар.

    Туганнар, якыннарыбыз - барыбыз да кызларны аерабыз. Ә минем өчен, әниләре өчен, алар икесе-ике кеше. Йөткерү, төчкерү, хәтта аяк тавышларыннан да аерам мин аларны.

    Берсе тыныч, берсе чаярак дип әйтә алмыйм. Икесе ике төрле чая. Беренче туганы-Илнара үзен олы кыз буларак тыйнаграк тота дип әйтер идем.

    Бүгенге көндә Илнара белән Динара Урта Балтай төп гомуми белем бирү мәктәбенең 4нче сыйныфында яхшы билгеләргә генә укыйлар. Икесе дә биергә, шигырь сөйләргә яраталар.

    Кызларыбыз, безнең гаиләбезнең тормыш йолдызлары. Әтиләре белән әниләренең шатлыклары да, сөенечләре дә. Кызларым хәзер үк минем төп булышчыларым. Сеңелләренең яраткан апалары.

    Кызларым Илнара, Динара! Һәрвакыт шундый шат күңелле булыгыз. Сәламәтлегегез көн дә артып торсын. Әтиегез белән әниегезгә таяныч, сеңелегезгә үрнәк, бер-берегезгә терәк булып яшәгез. Киләчәктә безгә сезнең бәхетегезгә сокланып яшәргә язсын.

    P.S. Игезәк балаларны үстерү турында китап язарга булыр иде. Алар турындагы фикерне барысын да дәфтәр битләренә генә язып бетереп булмый.

    Урта Балтай авылыннан игезәк кызлар үстерүче Фәния Хәйбуллина.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: