“Йолдыз” журналистлары юл сакчылары белән берлектә кабат рейдка чыктылар

Укучыларның язгы каникуллары алдыннан шоферларның җәяүлеләргә булган хөрмәтен, кагыйдәләрне ни дәрәҗәдә үтәүләрен тагын бер кабат инә күзеннән үткәрү иде ниятебез.

Рейдны Апас урта мәктәбе һәм "Кояшкай" балалар бакчасы янындагы җәяүлеләр сукмагы янәшәсеннән башладык. Биредә хәрәкәт бер дә туктап тормый. Тыз-быз транспортлар уза, җәяүлеләр каядыр ашыга. Руль артында утыручыларның күбесе туктап җәяүлегә юл бирә. Бер сәгать эчендә ашыгыч эше җәяүлеләр сукмагын "оныттырган" бары тик бер генә "батыр" табылды. Тик менә халык машиналарның пычрак кар суына коендырып китүеннән зарлана. "Кеше барганын күргәч, тизлекләрен азрак киметсәләр дә ярый бит инде. Чит ил машинасына утыру гына түгел, бераз хөрмәт тә кирәк", - диләр алар. Юл сакчылары исә очраган һәр балага хәвефсезлек кагыйдәләрен тагын бер кабат аңлаттылар, кабат-кабат кисәттеләр.

Аннан эшебезне Дүртиле, Идрәз авыллары янәшәсендә дәвам иттек. Машиналар торак пунктта тизлек режимын саклыймы? Куркынычсызлык каешын эләктереп йөриләрме? Барлык документлар да тәртиптәме, штрафлары вакытында түләнгәнме? Юл сакчылары барысына да игътибар итәргә, шоферларга таләп-кагыйдәләрне тагын бер кабат аңлатырга тырышты, тупас кагыйдә бозучыларга беркетмәләр төзелде. Бу көнне Тәтеш ягыннан килүче "99"лы машина хуҗасына да бераз үкенергә, кызарырга, акланырга туры килде. Ул исерткечләр кулланган хәлдә үзе кебек үк салмыш, шул ук вакытта правасы да булмаган дустына рульне ышанып тапшырган. Бер машинада биш салмыш кеше утырып баруы бераз аптырашта да калдырды. Ир-атлар шундый "яхшы" кәеф белән Казанга барырга чыккан. Тик, сәяхәтләре Идрәз авылы янындагы купер баганалары белән чикләнде. Үзләренең сәламәтлекләренә зыян килмәсә дә, машина төзекләндерүләр таләп итә. "Сәяхәтче"ләргә эчкән булуларын танудан башка чара калмады. Ә нинди штрафлар көткәне, мөгаен, айну белән башларына барып җиткәндер.

Юл сакчылары белдергәнчә, салмыш килеш юлга чыгучылар арасында төрле яшьтәгеләр бар. Бигрәк тә бәйрәмнәрдән соң "кичәге мәҗлес исләре аңкып торган" машина йөртүчеләр еш очрый икән. Бер кат таныклыгыннан мәхрүм булганнарның кабат салып машинага утыру очраклары да сер түгел. Андыйларга штрафның 50 мең сум булуын да истән чыгарырга ярамый.

- Спиртлы эчемлек кулланып руль артына утыручыларга карата законнарның катгыйлануы күпләрне уйланырга мәҗбүр итте. Салмыш шоферлар кимеде. Алкоголь кулланып руль артына утыручы 1,5 елга правасыннан мәхрүм ителү өстенә 30 мең сум штраф та түләргә тиеш. Шунысын да искәртергә кирәк, мондый административ җаваплылыкка рулен исерек кешегә биргән автомобиль хуҗасы да тартыла. Икенче тапкыр исереп эләгәсең икән, өч ел җәяү йөрергә кирәк булачак. Штраф исә 50 мең сумга җитә. Статистика буенча, һәр дүртенче юл һәлакәте исерек машина йөртүче гаебе белән килеп чыга. Бу үзеңнең дә, башкаларның да тормышына куркыныч тудыру дигән сүз. "Күтәренке кәефле" машина йөртүчеләргә йомшаклык күрсәтелмәячәк, - ди районның юл хәрәкәте иминлеге дәүләт инспекциясе җитәкчесе Румбик Гәрәев.

Юлга чыкканбыз икән, үзебезнең дә, тирә-юньдәгеләрнең дә тормышына куркыныч тудырмыйк! Өебезгә шатлык булып кайтыйк!

Фото:http://m.123ru.net/monchegorsk/2014-08-03/