Татарстанда төбәк юллары буенда 110 экологик кагыйдә бозу очрагы ачыкланган

1 апрельдән 31 майга кадәр «Юл хәрәкәте куркынычсызлыгы» белгечләре, республиканың Экология һәм табигый байлыклар министрлыгы белән берлектә, 43 муниципаль районда 118 автомобиль юлы буендагы кишәрлекләрне тикшерделәр. 

Тикшерү нәтиҗәләре буенча җир кишәрлекләре милекчеләренә һәм муниципалитет җитәкчеләренә карата җиде күрсәтмә һәм 75 кисәтү чыгарылган, бер беркетмә төзелгән. Хокук бозуларны бетерүгә ике ай вакыт бирелгән. Бүгенге көнгә 41 хокук бозу очрагы бетерелгән. Юл буе территорияләрен карап тоту буенча иң югары күрсәткечләр Кама Тамагы, Саба һәм Апас районнарында теркәлгән, анда мониторинг барышында хокук бозулар ачыкланмаган.
Тикшерүләр барышында юл буендагы рөхсәтсез чүплекләргә аерым игътибар бирелде. Белгечләр мәгълүматларына караганда, калдыкларны трассалар янында туплау әйләнә-тирә мохиткә зыян гына китереп калмый һәм янгын чыгу куркынычын арттыра гына түгел, ә юл хәрәкәте иминлегенә дә куркыныч тудырырга мөмкин. Тикшерүләр вакытында автомобиль юллары янында чүп-чар урнаштыруның дистәләгән очрагы теркәлгән. 

Чыганак – “Татар-информ”