Яңа клублы булачаклар

27 август көнне Дүртиле авылында яңа клубка нигез салынды. 100 кешегә исәпләнгән заманча, яңа мәдәният учагын быел өлгертү күздә тотыла. Нигез салу тантаналы төс алды. Авыл мулласы Әсрар Һидиятов барлык шартын китереп азан әйтте. Клуб мөдире Ләйсән Сәлимуллинаның да шатлыгы эченә сыймый. "Җылы, уңайлы клубны барлык авылдашлар белән зарыгып көтәбез", - ди ул. Нигез салу тантанасында район башлыгы Р.Н. Заһидуллин, район башкарма комитеты җитәкчесе Ф.Г. Әхмәтҗанов һәм төзелеш өчен җаваплы белгечләр катнаштылар. Шундый ук проект белән Карабай авылында да клуб төзү эше бара.