Апаста диңгезчеләр очрашты

(25 июль, “Апастово-информ”).

Диңгезче егетләрнең бәйрәм шатлыкларын бүлешергә гаиләләре, балалары да килгән иде.
Хәрби диңгез флотында хезмәт иткән егетләр очрашуларны әле башлап кына җибәрде. Алар ел саен җыелырга сүз куешты.
“Очрашуларны матур традициягә кертеп җибәрәсе иде. Диңгезчеләргә багышлап һәйкәл кую да кирәктер дип уйлыйм. Аны икенче бәйрәмгә кадәр өлгертәсе иде. Барыгызны да бәйрәм белән тәбрик итәм. Исәнлек-саулык булсын, гаиләләрдә тынычлык булсын, илдә сугышлар булмасын. Бер-беребезне яклап, саклап, матур гына районда яшәргә, эшләргә язсын”, - диде, үзе дә диңгез флотында хезмәт иткән, район башлыгы урынбасары Ленар Хантимиров.
Аның тәкъдимен һәркем хуплап чыкты. Егетләр бердәмлек белән һәйкәл төзүне башкарып чыгарга сөйләштеләр.
Диңгезчеләр өчен мәдәният хезмәткәрләре тырышлыгы белән матур концерт программасы да әзерләнгән иде.