Апаста Ватанны саклаучылар көнен билгеләп уздылар

(22 февраль, “Апастово-информ”).

Хезмәт коллективлары, хәрби бурычын кайнар нокталарда үтәгән ир-егетләр, чик сакчылары, өлкән һәм яшь буын Батырлар мемориал комплексына веноклар куйды. Мәңгелек ут янына чәчәкләр салынды. Батырлар бер минут тынлык белән искә алынды. Үз җирен һәрчак аяусыз яклаган райондашларга – Бөек Ватан сугышы ветераннарына, бүгенге көндә махсус хәрби операциядә намус белән изге бурычын үтәүче егетләргә рәхмәт сүзләре яңгырады. Чарада район башлыгы Айрат Җиһаншин, районның хәрби комиссары Наил Җантимеров, район башкарма комитеты җитәкчесе Булат Әхмәтҗанов катнашты.