Иске Йомралыда 94 яшьлек бабай сайлауга килгән

(16 март, “Апастово-информ”).

Тынгысыз җанлы Гарәф бабай участок вәкилләрен өендә генә көтеп утырмаган. Күпне күргән өлкән кеше буларак, тавыш бирүнең мөһимлеген дә яхшы аңлый.
Гарәф бабайның зиһене әйбәт, үзе зирәк. Бала чагының хәерчелектә үткәнен дә, авыр хезмәтләрдә тир түккәнен дә, гаиләсен туклы тормышлы итү максатыннан чит җирләрдә бәхет эзләп йөргәннәрен дә гыйбрәт итеп сөйли ул.
- Күрмәгәнем калмады инде, ул заманда колхозда бернинди техникасыз чәчәргә дә, урырга да, сугарга да туры килде. Биябашы авылыннан Каратунга урман да ташыдык, терлекчелек, тирмән эшләре дә калмады. Чит җирләргә китеп шахтада да эшләдем, - дип искә ала дәһшәтле елларны Гарәф бабай.
Гарәф бабай тормыш иптәше Фәридә әби белән 60 ел тату гомер кичергәннәр. Өч кыз бала тәрбияләп үстергәннәр. Бүгенге көндә балалары, оныклары үз гаиләләре белән яшәсәләр дә, әтиләрен онытмыйлар, кайтып хәлләрен белешеп торалар. Тик янында сөекле Фәридәсе генә юк. Яшьлегендә кавышып гомер иткән хатыны дөнья куйган.
“Тормышыбыз матур булсын, үткәннәрне искә алуы да авыр”, - ди бабай.

#ТатарстанАлга
#Татарстан #Россия #Выборы #ВыборыПрезидента #ВыборыПрезидентаТМ24