Апастово
  • Рус Тат
  • Хәтерләүдән курыкма син, үткәннәрне онытма син

    Үз йолаларыбызны, җырыбызны, моңыбызны үзебез сакламасак, аларны кем саклар, киләчәк буыннарга нинди эз, нинди мирас калыр, узган чорларны кем хәтерләр, чал тарихыбызга кем борылып карар соң? Менә шушы уйлар белән әле 1-2 ай элек кенә олы болгаерлылар музей оештыру эшенә керешкәннәр иде. Үткәннәрне барлау, буыннар чылбырын бәйләү, тарихи-мәдәни ядкәрләрне мәңгеләштерү...

    Үз йолаларыбызны, җырыбызны, моңыбызны үзебез сакламасак, аларны кем саклар, киләчәк буыннарга нинди эз, нинди мирас калыр, узган чорларны кем хәтерләр, чал тарихыбызга кем борылып карар соң? Менә шушы уйлар белән әле 1-2 ай элек кенә олы болгаерлылар музей оештыру эшенә керешкәннәр иде. Үткәннәрне барлау, буыннар чылбырын бәйләү, тарихи-мәдәни ядкәрләрне мәңгеләштерү максаты белән башланган эш төгәлләнеп, 8 сентябрьдә авыл халкы музей ачу тантанасына җыелды. Тарихи-мәдәни мирас елында узган бу чара авылдашларны, якташларны, дусларны күрештерде, очраштырды, гапләштерде, күңелле ял иттерде.

    Олы Болгаерның нәкъ уртасында хоккей тартмачыгы, авыл башында Бөек Җиңүнең 65 еллыгына багышланган һәйкәл төзеткән, сугыш һәм тыл ветераннарын олылап, хәлләрен белешеп, бүләкләр биреп торучы, авыл урамнарын тәртипкә китерүдә өлеш кертүче Олы Болгаерның игелекле уллары Әнсар Галиев һәм Рафис Гаптелганиев музей оештыруда да зур булышлык күрсәткәннәр. Алар иганәчелегендә һәм район башлыгы хуплавы белән авыл клубы төзекләндерелгән, матурланган, биредә үк музей бүлмәсе ясалган. Яңа гына сулыш өрелсә дә, музей экспонатларга бай. Атказанган колхозчылар, орден-медальле авылдашлар, Герой аналар, данлы якташлар, авыл тарихы, халкыбызның борынгы йолалары һәм көнкүреше турында тулы мәгълүмат туплауга, фотосурәтләр барлауга иганәчеләр һәм авыл җирлеге башлыгы Зилә Сәйфуллина, клуб хезмәткәрләре Миңнегөл Галиева, Нурия Мөбәрәкшина зур өлеш керткәннәр. Болгаерлылар белән беррәттән тирә-күрше авыл халкының да ярдәме тигән.

    Музей ачу тантанасы зур бәйрәмгә әверелде. Сәхнәдә ялкынлы чыгышлар, җыр-моң тынып тормады. Авылның тере тарихы булган, тиздән 90 яшьлеген билгеләп үтәчәк, иң өлкән акъәби Саимә Гыйниятуллина һәм Олы Болгаерның киләчәге - иң нәни Ильяс Сәлаховка тантананың истәлекле бүләкләре тапшырылды. Барлык изге эшләрнең башында торучыларның берсе - Биектау районының "Полигон" җәмгыяте җитәкчесе Әнсар Галиев барлык авылдашларын әлеге истәлекле көн белән тәбрик итеп, сугыш башланган елларда туып, әти дияргә тилмереп үскән, бар гомерләрен туган авылларында фидакарь хезмәткә багышлаган апа-абыйларга күчтәнәч-пакетлар тапшырды.

    Район башкарма комитеты җитәкчесе урынбасары Ранис Әхмәтшин, өлкән журналист Азат Сункишев, ветеран укытучы Бану Кадыйрова һәм башка кунакларның чыгышлары да тантанага ямь өстәде. Авылның сәхнәгә гашыйк үзешчәннәренә - җырчылары, тальянчылары, биючеләренә кушылып, Болгаер егетләре - танылган баянчы Илнур Ганиев, районыбыз сандугачы Айрат Айтуганов та бәйрәм сәламнәрен җиткерделәр. Гөлүсә һәм Гүзәл Гаптелганиевалар әтиләре Рафис иҗат иткән җырларны авылдашларына тәкъдим иттеләр һәм җылы алкышларга күмелделәр.

    Районның иң читендә урнашкан, гади генә, кечкенә генә Болгаер авылы шундый олы йөрәкле, игелекле, ярдәмчел уллар үстергән һәм алар белән хаклы рәвештә горурлана ала. Туган авыллары өчен җан атып, изгелек кылып яшәүчеләр, олы болгаерлылар үрнәгенә кушылучылар күбрәк булсын, ә музей тагын да баесын, аннан халык өзелмәсен иде.

    Нравится
    Поделиться:
    Реклама
    Комментарии (0)
    Осталось символов: