Шиномонтажда тәгәрмәч алмаштырганда нәрсәне үзең тикшерергә кирәк?

  Белгеч сүзләренчә, монтажлаган чакта шиналар һәм дисклар ватылырга мөмкин. Мәсәлән, шина куйганда мастер шактый көч куйса, яки хезмәттәшләрен ярдәмгә чакырса – бу шикләнү өчен сәбәп була ала.

  Балансировка вакытында шуңа игътибар итегез: тәгәрмәчне стендта әйләндергәндә «восьмерка» булмасын. Читтән карап торганда тәгәрмәч дискы сигезле саны кебек борылып-борылып әйләнә. Димәк, тәгәрмәч дискы кәкре һәм аны төзәтергә кирәк дигән сүз. Юкса машинада йөргән чакта руль селкенә – кулга бәрә.

  Моннан тыш, шиналарда басымны көйләсеннәр. Басым күрсәткече машина җитештерүче тәкъдим иткән диапозонда булырга тиеш. Гадәттә, бу сан бензин багы яки йөртүче утыра ишек янында ябыштырылган белешмәдә була.

  Автоэксперт киңәш иткәнчә, мастер ясаганнан соң, һәр тәгәрмәчнең болтларын махсус ачкыч белән тикшереп чыгу хәерле.

  _{Чыганак:https://intertat.tatar/news/sinomontazda-tagarmac-almastyrganda-narsane-uzen-tiksererga-kirak-5869079}

  _{Фото:https://ru.freepik.com/free-photo/technician-with-blue-workwear-holding-wrench-tire-while-showing-thumb-up_10519453.htm#fromView=search&page=1&position=8&uuid=0e90565b-fe42-4d40-9683-1c15ef36b851}