Вулкан атканнан соң, меңләгән турист Балида калган, араларында Россия кешеләре дә бар

  1584 метр биеклектәге Левотоби Лаки-Лаки вулканы 3 ноябрьдә ата башлаган – ул күккә 9 километр биеклеккә көл очырган. Вулкан урнашкан Флорес утравында 10 кеше һәлак булган. Кратерның якын-тирәсендә яшәгән кешеләрне эвакуацияләгәннәр. Көл болыты Балига килергә һәм аннан кайтып китәргә тиеш туристларга да комачаулаган.

  Авиакомпанияләр Денпасар аэропортында халыкара рейсларны яки туктаткан, яки тоткарлаган. Очып килү/очып китү таблосында дистәләгән рейста «вулкан аркасында туктады» дигән тамга тора. Меңләгән турист өенә кайта алмый, алар арасында Россия туристлары да бар. Аларга инде икенче тәүлек аэропортта кунарга туры килә. Ә якын арадагы рейслардагы билетларга бәя ихтыяҗ зур булу аркасында бик кыйммәтләнгән – кайбер билетларның бәясе миллион сумга ук җитә.

  «SHOT» Телеграм-каналына туристларның берсе, Мәскәүдән килгән Елена сөйләгәнчә, алар инде икенче тәүлек Денпасар терминалында төн куна. Аларга су да, ризык та, кунакханә дә бирмәгәннәр. «China Southern Airlines» вәкилләре булачак рейсларга үз хисапларына билетларга бронь ясарга тәкъдим иткән. Гадәттән тыш хәл аркасында хәзер Мәскәүгә кадәр билет ат бәясе тора – 700 мең сумга кадәр җитә.

  «Аэропортта бик күп кеше калды, аларның билетка да, яшәргә дә, ашарга да акчалары юк. Акчаларны кире кайтару өчен запрос ясарга тәкъдим итәләр, тик моның максималь суммасы 100 мең сум, ә билет бәяләре 250 мең сумнан башлана. Һәм алар гаризаны да 60 көн эчендә карыйлар. Сорау: безгә Балидан ничек кайтып китәргә?» – дип сөйләгән Елена.

  Илчелектә хәзер Балида булган россиялеләргә вулкан ата торган районнардан читтәрәк булырга киңәш иттеләр. Ул әле дә бик куркыныч. Рейслар кимендә берничә көннән соң гына яңартачаклар.

_{Чыганак:https://intertat.tatar/news/vulkan-atkannan-son-menlagan-turist-balida-kalgan-aralarynda-rossiya-keselare-da-bar-5869506}

_{Фото: «ИнтерТат»}