Кул белән 40ар сыер сауган көннәр бар иде, ди Нурания әби Халикова

Аңа Ил башлыгының Котлау хаты, район башлыгының Котлау открыткасы, бүләкләр, чәчәк бәйләме бүләк ителде. Район башкарма комитеты җитәкчесе урынбасары Луиза Сафина, Шәмбалыкчы авыл җирлеге башлыгы Физзәт Миңнуллин изге теләкләрен юллады. 
Нурания әби гаиләдә 8нче бала үскән һәм тормышында күп авырлыклар күргән. 3 абыйсын сугышта югалткан. Якын туганнарының, әти-әнисенең дә гомерләре озын булмаган. Барлык авырлыкларны хезмәт белән онытырга тырышкан. Сыер сауган, пекарняда ипи пешергән, кошчылык фабрикасында чебиләр караган ул. 
–40ар сыерны кул белән сава идем. Балаларны аякка бастырыйм дип эшләдем дә, эшләдем, – ди әби үзе. 
Нурания әби 5 бала тәрбияләп үстергән. Тормыш иптәшен вакытсыз югалтып, аларны сыңар канат белән тормыш юлына бастырган. Бүген барысының да кадер-хөрмәтен, яратуын тоеп яши. 10 онык, 10 оныкчыгын сөеп туймый.