Телефоннан сөйләшкән апаслының сумкасына “кереп чыкканнар“

С. бистәсендә яшәүче бер ир-ат хастаханәдә кырын куллы кешегә юлыга. Дөресрәге, улы белән телефоннан сөйләшкән арада, барлык документларыннан ( сумкасыннан) колак кага. Нык хафага тарыган А. полиция хезмәткәрләренә хәбәр итә. 
Тиз арада полиция хезмәткәрләре килеп тә тә җитә, эзләү-тикшерү эшләре башлана. Алар борчылмаска, өметсезлеккә бирелмәскә кушалар, һичшиксез угрының эзенә төшәчәкләренә ышандыралар. 
Сумкасы табылган очракта да, барлык документлары табылачагына ышанып бетми зыян күрүче. Ә чынлыкта угрының эзенә тиз төшәләр, барысы да хуҗасына кайтарыла. 
Районыбызда полиция хезмәткәрләре нәтиҗәле эшли икән бит, дип сөенә А. , һәм район эчке эшләр бүлегенең участок инспекторы Рәсим Гатауллин белән Руслан Ваһаповка рәхмәтен белдерә. Акчаны, малны хәләл көч белән эшләп табарга, кеше малына кызыкмаска кирәклегенә төшенсен иде җинаятче, ди А.