Яңа ел яңа шатлыклар, уңышлар алып килсен!

Йогышлы замана чире янәшәбездә яшәвен дәвам итте. Күп югалтулар да кичердек. Шуның өстенә табигать тә корылык белән сынады. Тик шулай да без начар яшәмәдек һәм эшләмәдек. Барлык катлаулылыкны җиңеп алга барабыз. Уртак тырышлыгыбыз нәтиҗәсендә һәр өлкәдә зур уңышларга да ирештек. Бу ел хезмәт казанышлары белән истә калыр, районыбыз тарихы битләрендә күренекле урын алыр. Һәр өлкәдә горурланып сөйләрлек уңышларыбыз бар. Төзелешме ул, мәдәниятме, мәгарифме, авыл хуҗалыгы өлкәсеме – барысында да уңай якка сизелерлек үзгәрешләр булды. Яшь буынны тәрбияләү, сәламләтләндерү, ял иттерү өчен районыбызда барлык уңайлылыклар да тудырылган. Өлкәннәр дә игътибар үзәгендә. Аларның район тормышында кайнап яшәүләрен күреп сокланып туя алмыйбыз. Районыбыз көннән-көн үзгәрә, матурлана, чәчәк ата.
Елны матур гына төгәллибез. Һәр өлкәдә хезмәт иткән райондашларга рәхмәт сүзләрен җиткерәм. Ел җиңел генә узмады. Шул ук вакытта горурланырлык нәтиҗәләребез дә бар. Киләсе елда да төрле программаларда катнашып, нәтиҗәле эшләрбез дигән ышаныч зур.
Сайлауларда да активлык күрсәтеп, үз сүзен кыю әйткән райондашларга да зур рәхмәт.
Хөрмәтле райондашлар, читтә яшәүче якташларыбыз! Барыгызны да якынлашып килүче Яңа ел белән ихластан тәбрик итәм. Илгә-көнгә тынычлык, сабырлык, гаиләләрегезгә тигезлек, һәрберегезгә дә сәламәтлек телим. Чирләр урап узсын. Бер-беребезне югалтмыйча, бергә һәм бердәм булып яшәргә язсын.
Айрат Җиһаншин,
муниципаль район башлыгы.