Үз хокукларыңны бел

Бюджет тармагындагы учреждение-оешмаларда эшләүчеләр арасында район халыкны социаль яклау идарәсе аша ял йортлары, курорт-санаторийларга ташламалы юллама алучылар елдан-ел арта. Узган елда, мәсәлән, идарә аша 39 апаслы шундый юллама алган. Быелның сигез аенда 23 кеше юлламалы булган. 
-Безнең аша юлламаны Татарстанда урнашкан “Васильево”, “Дельфин” (икесе дә Яшел Үзән районы территориясендә), Казан тирәсендәге “Крутушка”, “Ливадия” һәм “Санта” ял итү йортлары, санаторийләргә генә алып була,-дип аңлата бу мәсьәләләр белән шөгылләнүче белгеч Елена Закирова 
-Аның шартлары нинди? 
-Бу кешенең дәүләт һәм муниципаль бюджет учреждение-оешмаларында эшләве төп таләпләрнең берсе. Ул башта үз җирле профсоюз оешмасына мөрәҗәгать итәргә тиеш. Юлламаларның ташламалы булуын ассызыклыйм. Аны алу өчен претендент гаиләсенең гомуми соңгы 3 айлык кереме турындагы белешмә белән бергә аерым гариза тапшырырга кирәк. Шулай ук юллама алу өчен медицина учреждениесенең 070/у-04 формалы белешмәсе дә кирәк була. Шуннан соң бу кеше аерым чиратка куелып, юллама бүлеп бирелү көне билгеләнә. 
-Юллама ташламалы дию нәрсәне аңлата? 
-Юллама гадәттә 18-21 көнлек була. Аның тулы бәясе, әйтик, 40000 сум булырга мөмкин. Барлык шартлар да үтәлеп, ташлама күләменең 10-60 процентка җитүе ихтимал. Кайбер очракларда юлламаның 10 процентын гына түләү мисаллары да бар. 
-Бу ташламаларны кем хисабына кичерәләр, аны кем күтәрә? 
-Җирле һәм Татарстан профсоюзлары казнасыннан. Шулай ук республиканың социаль иминиятләштерү Фонды, башка дәүләт чыганаклары да өлеш кертә. 
-Әгәр дә сезгә мөрәҗәгать итүче апаслы эшләгән оешмада җирле профсоюз оешмасы булмаса, аның үтенече кире кагыламы? 
-Бер дә куркыныч юк, бу очракта туры безгә-халыкны социаль яклау район идарәсенә килергә кирәк. 
Җавапларны Ришат Җамалиев әзерләде.