МӘКТӘПЛӘРДӘ ҖАВАПЛЫ ЧОР ҖИТӘ

Район мәдәният йортында узган ата-аналар җыелышында район башлыгы Бердәм Дәүләт имтиханнарын уңышлы тапшыру бурычын куйды. "Кайсы уку йортына керәсен алдан хәл итеп, укучылар имтиханнарны дөрес сайларга тиеш. Әти-әниләр, укытучылар дөрес юнәлеш күрсәтсеннәр иде", - диде ул. Район мәгариф бүлеге җитәкчесе Алсу Хәйруллина 9 һәм 11 чыгарылыш классларының имтихан тапшыру тәртипләре, вакыты хакында сөйләде. Казан Федераль университетыннан, шулай ук республиканың төрле югары уку йортларыннан, Апас аграр көллиятеннән килгән вәкилләр кабул итү шартлары белән таныштырдылар, әти-әниләрнең сорауларына җаваплар бирделәр.