1 апрельдән чисталык икеайлыгы башлана

Һәр ел саен яз җитүгә "Районыбызны гөлбакча итик!" девизы астында өмәләргә чыгабыз. Быел да район башлыгы Боерыгы нигезендә, 1 апрельдән әйләнә-тирәне чистарту, төзекләндерү һәм яшелләндерү икеайлыгы башланып китә. Айлыкның шарты буенча һәр кеше үзе яшәгән, үзе эшләгән тирәлекне тәртипкә китерергә, табигатебезнең гүзәл, сулар һавабызның саф, эчәр суларыбызның чиста булуына өлеш кертергә тиеш.

Чисталык икеайлыгы 1 июньгә кадәр дәвам итәчәк. Шушы чорда Бөек Җиңүнең 70 еллыгы уңаеннан агачлар утырту, "Чиста урманнар" акциясендә катнашу, иң яхшы авыл җирлеген, иң чиста урамны, иң яхшы каралган хуҗалыкны, халыкка иң яхшы хезмәт күрсәтүчене ачыклау да безнең максат булып кала.