Апаста туучылар арткан, үлүчеләр кимегән

18 декабрьдә ЗАГС хезмәткәрләре һөнәри бәйрәмнәрен билгеләп үтәләр. Быел әлеге хезмәт оешуга 96 ел тула.

Узып баручы Елан елы районыбызга күп кенә шатлыклы вакыйгалар бүләк итте. Мисал өчен, 44 пар Алтын, 2 пар Бриллиант туйларын билгеләп үттеләр. Өч гаиләдә игезәк сабыйлар тавышы яңгырады.

Быел ЗАГС бүлегенә гариза тапшырган иң яшь кияү 17, иң өлкән кияү 67 яшьтә. Иң яшь кәләш - 16, иң өлкән кәләш - 65 яшьлек.

Кече Болгаер егете Илфат Фәйзуллин Урта Балтай кызы Миләүшә Хөснетдинованы үзенә гомерлек яр итеп сайлады. Алар 15 ноябрьдә Кызыл туйларын билгеләп үттеләр. Илфат авылда тракторчы булып эшли, Миләүшә мәдәният белгече.