“Теләк булганда вакыт табыла»

Өй каршысында балалар өчен уен мәйданчыгы ясалган. Йорт тирәләре чәчәкләр һәм кулдан ясалган сыннар белән бизәлгән. Бакчада да һәр почмакта тәртип хөкем сөрә.

-Мин үзем Чирмешән авылы кызы. Хәзерге вакытта гаиләм белән Каратунда яшим. Ирем Радик та, үземдә тик торырга яратмыйбыз. Тормышка, матурлыкка гашыйк кешеләр без. Бергәләп эшлибез, күңел теләгәнчә булысын дип тырышабыз, - ди Гөлнара.

Бакчаларны, йорт каршыларын, ишегалларын бизәгән сыннарны да Гөлнара үз куллары белән ясаган. Кайсына пластик савытлар, кайсына цемент кулланган. Үзенчәлекле итеп буяп та куйган. Сыннарны исә эштән бушаган вакытларда ясый.

-Аз гына да тик торырга яратмыйм. Теләк булганда вакыт та была. Алар үзләреннән-үзләре туа. Эшнең нәтиҗәсен күрү рәхәт бит ул. Бакчага чыгып карап йөрергә яратам. Барысы да иҗат җимешләре, күңел җылысы салынган, - ди үзе.

Кич белән Сибгатуллиннар капка төбе балаларның шат авазына күмелә. Тирә-күршедә яшәүче балалар да бирегә уйнарга килә. Уенчыкларны да яңартып, сыннарны һәр фасылда алмаштырып куя алар. Җәен төрле тәгәрмәчләрдән, су савытларыннан ясасалар, кышын кардан, боздан катыралар. Ул-кызлары машина юлыннан читтәрәк урнашкан мәйданчыкта уйнагач, әти-әниләрнең дә күңеле тыныч.

Ләйлә Шиһабиева.