Апаста “Игътибар, балалар!“ чарасы 3 июньгә кадәр дәвам итә

(29 май, “Апастово-информ“).

Әлеге чара юлда һәм транспортта балаларның зыян күрүен булдырмау максатында оештырыла. Бу чорда балаларны автомобильдә йөртүгә, балалар бакчалары янында юл йөрү кагыйдәләренең үтәлүенә аеруча игътибар ителәчәк. Бу хакта районның юл хәрәкәте иминлеге дәүләт инспекторы Рамил Гафуров хәбәр итте.

“Балаларының хәвефсезлегенә игътибар итмәүче әти-әниләр очрап тора. “Игътибар, балалар!“ операциясе барышында да, баласын махсус утыргычта йөртмәүче бер шофер белән очраштык. Шулай ук яше җитмәгән улына машина ышанып тапшырган әти-әни дә кисәтү алды, – ди Рамил Гафуров.