Ахметов: Юллама җәмгыятьне туган телләрне саклауга һәм үстерүгә туплый

(24 сентябрь, “Апастово-информ”).

Татарстан Президенты юлламасында 2021нче елны туган телләрне саклау, үстерү һәм халыклар бердәмлеге Елы итеп игълан итү - Татарстан җәмгыятен бу юнәлештә сизелерлек уңышларга туплый. Татарстан Дәүләт Советы рәисе урынбасары Марат Ахметов журналистларга шундый фикерен белдерде.
Ул билгеләп үткәнчә, Татарстан Президенты юлламасы - республиканың бөтен тармакларындагы тормышны һәм республикадан читтәге барлык мәсьәләләрне чагылдырган стратегик документ.
“Татарстан Президентының сайлау алды платформасында туган телләрне һәм традицияләрне саклау, рухи үсеш турындагы тезислар яңгыраган иде. Ә инде юллама анда куелган бурычларны хәл итүгә юнәлдерелгән”, - дип, билгеләп үтте Ахметов.
Ул үзенең Татарстан Президенты каршындагы татар телен саклау һәм үстерү мәсьәләләре буенча комиссия җитәкчесе булуын искә төшерде. Юлламада туган телләрне саклау һәм халыклар бердәмлеге Елын игълан итү - бу юнәлештә эшне сизелерлек көчәйтергә мөмкинлек бирәчәк.