Ихластан пешерсәң, ризык тәмле була

(15 октябрь, “Апастово-информ”). 
 
Дания апа аш-су серләренә әнисе Михриҗиһаннан өйрәнгән. Аның янәшәсендә беренче ризыкларын да пешергән. 
 
«Әнием бик оста һәм тәмле куллы иде. Кунак уздырган авылдашларга да камыр ризыклары пешереп бирде. Аның пешергән кабартма, юка, кыстыбыйларының тәме әле дә тел очында тора. Хәзер дә балалар: “Дәү әнинеке кебекне пешерәсеңме?“ дип сорыйлар. Һаман өйрәнәм. Әнигә җитешеп булмый шул әле”, – ди ул. 
 
Дания апа үзе дә аш-суны бик яратып әзерли. Камыр ризыклары да күпереп пешә. 
 
«Бар күңелеңне биреп, ихластан пешерсәң, ризык тәмле була. Кайчакларда “Тәмлерәк булсын әле“ дип артыграк та тырышасың, ул көнне син көткәнчә чыкмаска да мөмкин. Яхшы кәеф белән тотынып, ашыгып кына пешергән камырлар аеруча күпереп пешә. Ризык ул кәефне дә, кайбер кирәкле әйбереңнең җитеп бетмәвен дә тиз сизеп ала, – ди Дания апа.