Районның газ хезмәте эшчеләре газ җиһазларына техник хезмәт күрсәтү вакытында кайбер җитешсезлекләргә юлыга

(21 март, “Апастово-информ”).

  Ул өйләрдә җылылык, уңайлылык бирә, әмма сак кулланмаган очракта куркыныч тудырырга да мөмкин.
  «Зәңгәр ягулык» белән бәйле күпчелек фаҗигаләр кулланучыларның көнкүрештә газны дөрес куллану кагыйдәләрен бозулары аркасында килеп чыга.
Газ хезмәте эшчеләре техник хезмәт күрсәтү вакытында еш кына кайбер җитешсезлекләргә юлыга.
  “Иң беренче чиратта, йорт хуҗалары газ җиһазларының торышына игътибар итәргә тиеш. Газ җиһазлары яхшы хәлдә, аларның куркынычсызлык автоматикасы төзек булуы мөһим. Икенче мөһим шарт: газ җиһазлары эшләгән бүлмәдә һава алмашынып торырга тиеш. Кайбер фатир хуҗалары матурлык тудыру нияте белән махсус вентиляция урыннарын обои ябыштырып яисә башкача каплап куялар. Бу үз чиратында һава йөрешен тоткарлый һәм сөрем газы яки газ приборларының төзексезлеге аркасында газ җыелуга сәбәпче булырга мөмкин. Шулай ук, хәзер кухня бүлмәләрендә газ торбалары, стенага беркетелгән газ котеллары, төтен чыгу юллары махсус җиһазлар белән томалана, ягъни яшерелә. Бу, билгеле, карап торышка бик матур булса да, ләкин куркыныч. Чөнки газ чыккан очракта газ хезмәткәрләренә газ чыгу урынын тиз арада табып, туктатуны кыенлаштыра, комачаулый. Шулай ук газ плитәләре яки колонкалары урнаштырылган студия-кухняларда йокларга ярамый. Шуны белеп торырыга кирәк: газ плитәләрен һәм колонкаларын мөстәкыйль рәвештә урнаштыру тыела. Газ җиһазларын моңа хокукы булган махсуслашкан оешмалар гына алмаштыра яисә урнаштыра ала”, - дип кисәтә районның газ хезмәте белгечләре.
  Йортларда, фатирларда урнаштырылган газ җиһазларына газ хезмәткәрләре тарафыннан елга бер тапкыр техник тикшерү уздырыла. Бу чара иминлек максатыннан оештырыла.
  “Хуҗа кеше моңа бик җаваплы карарга, газ хезмәткәрләрен йортка кертергә, техник хезмәт уздырырга мөмкинлек бирергә бурычлы. Әгәр белә торып, моңа каршы килгән очракта, хуҗа кешегә хәтта штраф та бирелергә мөмкин. Шуны әйтергә кирәк, бу һәр хуҗа кешенең намус эше. Чөнки ут-күз казасы бернәрсәне дә, беркемне дә аямый. Шуңа күрә газ приборларын игьтибарсыз калдырырга ярамый. Бераз гына да газ исе сизелә икән, газ җиһазларын сүндереп, краннарны ябарга, тәрәзәләрне ачып җилләтергә, бу бүлмәдән тиз арда чыгарга һәм 04 номеры буенча яки мобиль телефоннан 104 номеры буенча район газ хезмәтенең авария хезмәтенә шалтыратырга кирәк”, - дип киңәш итәләр газ хезмәткәрләре.

_{Фото:https://ru.freepik.com/free-photo/steel-pipelines-cables-plant_1119695.htm#fromView=search&page=3&position=47&uuid=7bfb0f1b-3669-43fe-8251-8eaf3fb512d6&query}