Сигез айлык авыры булган хатын табибларга мөрәҗәгать иткән

Иркутск өлкәсендә үпкәләре 100 процент — тулысынча зарарланган йөкле хатынны табиблар коткарган. Ул коронавирус ияртеп авырган. Хатын сау-сәламәт бала тудырган. Бу турыда РЕН ТВ хәбәр итте.

Авыру хатын ике ай диярлек перинаталь үзәкнең реанимациясендә дәвалана. Шул вакытта табиблар кесарев кисеме ясап, баланы дөньяга китерә. Дәвалау вакытында баланы анасыннан аералар. Кыз бала җитлекмичә туган.

Сигез айлык авыры булган хатын температурасы күтәрелгәч, табибларга мөрәҗәгать иткән. «Температурам 38гә күтәрелде. Өч көн үзем дәваланып карадым. Ләкин булдыра алмавымны аңладым. Хастаханәгә мөрәҗәгать иттем. Сулыш алу кыенлашты, авыр һәм куркыныч иде. Куркуны басарга тырыштым», — дип сөйли бу хатын.

Авыру хатын карынындагы балага кислород җитми башлый. Чөнки аның анасының үпкәләре тулысынча зарарланып бетә. Кесарев кисеме ясап, баланы алгач, хатынның хәле тагын да начарлана, аны ИВЛга тоташтыралар. Хатын 51 көн реанимациядә була. Аны дарулар белән йоклатып торалар. Аннары уянгач, баласының фотосын күрсәтеп сөендерәләр, диелә хәбәрдә.

Чыганак: https://intertat.tatar/news/kadak/20-01-2021/covid-19-bel-n-avyryp-pk-l-re-tulysyncha-zararlangan-y-kle-hatyn-s-lam-t-bala-tapkan-5800107