Вирустан соңгы тормыш

(25 май, “Апастово-информ”).

Вирус туктар ул. Тормыш дәвам итәр. Вирустан соңгы тормышны ничек күзалларга соң? Татарстан Икътисад министрлыгында бу хакта бүгеннән уйлыйлар. Россия эшмәкәрләре көнендә бөтен илебез бизнесменнары өчен зур күләмле онлайн-форум үткәрүне планлаштырганнар.

“Яңа шартларда бизнесны ничек алып барырга соң, дигән сорауга җавап эзләүгә багышланган онлайн-форум - үзизоляцияләү режимыннан чыгу һәм бер-береңә ярдәм күрсәтеп, эшмәкәрләргә тәҗрибә уртаклашуга юнәлтелгән”, - диделәр министрлыкта.

Хөкүмәт вәкилләре белән сөйләшү, сорауларга җаваплар эзләү, экспертларның докладларын тыңлау, онлайн-режимда булса да бер-берең белән ачыктан-ачык аңлашу мөмкинлеге дә булачак.

“Эшмәкәрләр үзләре һәм дәүләт органнары вәкилләре тәҗрибә уртаклашачаклар, шулай ук, дәүләт ярдәме турында сөйләячәкләр. Экспертлар һәм белгечләр бүгенге шартларда бизнес алып баруга ярдәм күрсәтү турында консультация дә бирәчәкләр”, - дип әйттеләр форумны оештыручылар.

Форумның онлайн-мәйданчыгы 26нчы майда 15.00 сәгатьтә Zoom платформасында эшли башлаячак. Шулай ук, YouTube-каналында “Эшмәкәрлек фабрикасы” проекты кысаларында, параллель трансляция барачак.