Алга, компас буенча!

Апас аграр көллиятендә бүген булачак солдатлар армиягә һөнәр алып китәләр. Тулы әзерлекле "С" категорияле хәрби шофер, бронетранспортер, хәрби пехота, десант чылбырлы машинасы, танк йөртүче механик булып армиягә чакырылучы яшь апаслыларга хәрби хезмәт тә җиңелрәк бирелә. Шундый ысул белән соңгы 5 елда көллият аудиторияләрендә 250 яшь хәрби белгеч әзерләнде. 26 июньдә быелгы курсларның 15 чыгарылыш курсанты хәрби "КамАЗ"лар белән 100әр километрлык "марш-бросок" маршруты үттеләр. МТЛБ хәрби транспортер механигына укыган курсантлар 6 июльдә 50 километрлык юл үтеп, шулай ук кулларына махсус таныклыклар алачак.