Апас районында халык җыеннары августта үтәчәк

Район халкын борчыган сорауларны уртага салып сөйләшү, проблемаларын хәл итү максатыннан, даими рәвештә халык җыеннары үтә. Быел да август аеның икенче яртысында авыл җирлекләрендә, хезмәт коллективларында халык җыеннары оештырылачак. Киләчәкне күзаллап, районыбызның төрле яклап үсеше өчен этәргеч бирүче тәкъдимнәр "Бердәм Россия" партиясенең киләсе биш елдагы эш программасына кертеләчәк. Халык җыеннарын уздыруны, киләчәккә планнар корганда халык фикеренә дә таянуны 8 июль көнне Дәүләт Советында узган киңәшмәдә Татарстан Республикасы Президенты Рөстәм Миңнеханов бурыч итеп куйды.