Останың эше дә көлеп торыр

Районда иң соңгы сыер-бозау көтүе табигый көтүлекләр, җәйге лагерьларга чыгарылганга инде ике ай була. Ферма торакларына ремонтчы-төзүчеләр аяк басканга да шуның кадәр үк вакыт үтте. Кышлату сезонына быел районда 150дән артык ферма тораклары, башка корылмаларны 1 сентябрьгә үк әзерләп кую максаты куела.
Акхуҗада бу эшкә аеруча җитди карыйлар. Ферма мөдире Фәһим Абделмәнов төзүчеләр эшен ныклы күзәтү астында тота. Рафис Мәрдәнов, Айдар Сөнгатуллин, Мәсъгут Курамшин үз вазифаларын төгәл башкаралар. Аларның кулдашлары Николай Богатырев, Разыйм Әхмәтҗанов, Фирдүс Хантимеровның да балта-чүкечләре тик тормый бу көннәрдә.