Урманда да кеше булып кал!

Районда 1 апрельдән башланган "Татарстанның чиста урманнары" акциясе дәвам итә. Төбәк Черкен участок урман хуҗалыгының участок урманчысы (участковый лесничий) И.М. Иванов безгә хәбәр иткәнчә, аның барышында районда 136 гектар мәйданда урманнарны чистарту, җыелган чүп-чарны полигоннарга чыгару яки җиргә күмү эшләре башкарылган. Акция җиргә кар ятканчы дәвам итәчәк.

- Урманнарга чүп чар чыгарып түгәргә җөрьәт итүчеләр әле дә бар, - ди Иван Михайлович. - Ачыклангач, андый алама гадәтле физик затларга 5000 сумга кадәр штраф салына. Алар табигатькә китергән зыянны каплау, чистарту эшләренә тотылган чыгымнар РФ һәм ТР Законнарына нигезләнеп, суд аша бишләтә күләмдә эзләтеп алына. Урманнарыбызны мәсхәрәләүче, аңа зыян китерүче юридик затларга 1 млн. сумга кадәр штраф санкцияләре яный.