3 комбайнчы премия алды

-Бүгенгә агрофирма буенча инде 20 алдынгы комбайнчыбыз шундый бүләккә лаек булды һәм кырга килеп хөрмәтләнде,-ди Марат Хәсәнов. -Бу премия төп хезмәт хакыннан тыш бирелә. Шул исәптән, Дәүләкидән әтиле-уллы Фирдүс белән Ринат Ибәтуллин экипажы бу премияне ике тапкыр алды. Шулай ук аларның авылдашлары, әтиле-уллы Хәйдәр белән Ленар Шәрипов экипажы бу көнгә 24 мең центнер ашлык суктырды, аларга да икенче, 5000 сумлык  премия язылды һәм бүген-иртәгә ул зурлап тапшырылачак.

-Быел безнең район күләмендә бөртеккә дип аерым технология буенча чәчелгән кукурузны да кертеп, бөртекле һәм кузаклы культуралар 29178 гектар мәйдан били. Шуның арыш, арпа бодай өлеше 27 мең гектарда чәчелде. Уңыш чыгышы бик матур-бүгенгә район буенча бер гектарга 32,1 центнер тәшкил итә. 29 августка район буенча тагын 7,5 мең гектарда язгы сабан, башаклы культуралар уңышын җыеп аласы калды. Инде горчица чәчелгән басуларда аны теземнәргә салу башланды. Кукуруз басуларында да эш темпы югары. Аның да уңышы яхшы чыга һәм кышлату чорына ике елга җитәрлек силос салу бурычын җиренә җиткереп үтәү өчен мөмкинлекләребез җитә,-диде үз чиратында кырда эшләүче игенчеләр белән әңгәмә корып, район авыл хуҗалыгы идарәсе җитәкчесе Ильяс Заһидуллин.

Ришат Җамалиев.