Сәламәт рух, сәламәт аң – зур байлык

Республикакүләм наркотикларга каршы "Мөстәкыйль балалар" проекты кысаларында, Биеш мәктәбе укучылары "Без - сәламәт Россия өчен" акциясен үткәрделәр. Алар халык күп була торган урыннарда исерткеч эчемлекләр эчүгә каршы чыгышлар ясадылар, әлеге эчемлекләрнең ни кадәрле зыян китерүен аңлаттылар, буклетлар тараттылар. Проект һәм акциянең эчтәлеген чагылдырган плакатлар белән Свияжский бистәсендә балалар һәм яшүсмерләр белән очраштылар. Исерткечләрның сәламәтлеккә тискәре йогынты ясавы турында сөйләп, "Мин - сәламәт Россия өчен" дигән плакатка имзалар җыйдылар. Әлеге имзаларның саны - акциянең нәтиҗәсен күрсәтте. Яшь буынны начар гадәтләрдән, тискәре күренешләрдән аралап калу бүгенге көннең төп бурычы. Чөнки киләчәгебез дә нинди алмаш үсүгә бәйле.