“Ак Барс Холдинг“ компаниясенең агросәнәгать буенча генераль директорның урынбасары Камиль Галиев: Күрсәткечләр әйбәт, әмма әле башкарасы эшләр күп

Иске Йомралы авылының мәдәният йортында "Свияга" берләшмәсенең 2017 ел нәтиҗәләре буенча бүлекчә җитәкчеләре, ферма мөдирләре катнашында җыелыш узды. Киңәшмәдә Апас районының азык-төлек идарәсе җитәкчесе Ильяс Заһидуллин, "Ак Барс Холдинг" компаниясенең агросәнәгать буенча генераль директорның урынбасары Камиль Галиев һәм "Свияга" агрофирмасы җитәкчесе Марат Хәсәнов катнашты.

Җыелышта берләшмәнең бүлекчәләрендәге сөт һәм ит җитештерү нәтиҗәләре каралды. Һәрбер тармакта булган мәсьәләләр җентекләп күз алдыннан үткәрелде. Яңа унсигезенче елга планнар буенча да әңгәмә корылды.

Камиль Галиевның сүзләренә караганда: "Күрсәткечләр әйбәт, әмма әле башкарасы эшләр күп. Елдан ел экономик вәзгыять үзгәреп тора һәм без анарга яраклашып өлгерергә тиеш. Ә моның өчен инде һәр тормактагы кешеләр үз эшен югары дәрәҗәдә үтәргә йөкләмә алырга тиешле. Шушы очракта гына сыйфатлы продукция җитештереп булачак".

Айрат Аминов.