Кем биеккәрәк сикерә - Апас паркына скейт-трекка килерсез!

Апас үзәк ял паркында төзелеш дәвам итә. Аның уртасындагы шарлы фонтанлы күл ясалма таш белән матур итеп тышланды. Паркның көнчыгыш чигендә скейт-трек, җәйге заманча кинотеатр, санитар зона урнашачак. Подрядчылар тәгәрмәчле тактага басып йөрергә яратучыларга махсус фанерадан каток-трамплин ясау өчен мәйданчыкны бетонлау, аны яктырту, видеокүзәтү системасын монтажлауны төгәлләделәр. Соңгы өмәләрдә балалар мәйданчыгы, тротуарлар, амфитеатрлы зур сәхнә дә ыспайланды. Тик менә шактый кыйммәт бәяләнүче декоратив туя агачлары аллея-скверында корып, үсеп-ныгып китә алмаучы яшь үсентеләр күренгәли. Бәлкем алар өчен махсус тамчылы сугару системасы кую турында уйларга вакыт җитмәдеме икән?!
Ришат Җамалиев.