Апаста “Җиңү салюты” фестивале дәвам итә

(3 нче апрель, “Апастово-информ”).

  Бөек Җиңүнең 80 еллыгына багышланган “Җиңү салюты” фестивале Урта Балтай мәдәният йорты сәхнәсендә дәвам итте. Мәдәният йортының фойесында җирлекләр бик тә бай эчтәлекле, кызыклы мәгълүматлар туплап күргәзмә оештырганнар иде. Килгән һәрбер кеше тамаша залына узганчы күргәзмә белән танышып хатирәләр яңарттылар. Өлкән буын яшьлекләрен искә алды, шулай ук Бөек Ватан сугышы елларының авырлыкларын, яралы солдатларны да сурәтләделәр. Гармун моңнарына кушылып патриотик рухтагы җырлар да яңгырады.

Фестивальдә катнашучыларны, тамашачыны район башлыгы Айрат Җиһаншин исеменнән урынбасары Ленар Хантимиров сәламләде.

“Хөрмәтле тамашачылар! Район башлыгы Айрат Җиһаншин теләктәшлеге белән районда авыл җирлекләре арасында Бөек Җиңүнең 80 еллыгына багышланган фестиваль оештырылды. Һәм ул бик уңышлы гына бара. Бүген әлеге сәхнәдә өч җирлек чыгыш ясаячак. Фойеда эчтәлекле күргәзмә дә оештырылган. Бөек Ватан сугышына карата һәрбер истәлек кадерле һәм кирәкле.  Әйтеп китәсе килә, бүгенге көндә районда бер ветераныбыз, ике Ленинград камалышы корбаннары яши. Шулай ук 107 тыл хезмәтчәннәре бар. Шушы фестивалебез ветераннарыбызга хөрмәт һәм дан булып ирешсен иде. Аларның батырлыкларына рәхмәт әйтәсе килә. Бүгенге көндә махсус хәрби операциядә 278 райондашыбыз катнаша, 28 е “Батырлык” ордены белән бүләкләнде, Багыш авылыннан “Россия Герое”быз да бар. Егетләребез сау-сәламәт булып, исән-имин гаиләләренә кайтуларын телим. Барлык катнашучыларга рәхмәтебезне ирештерәм. Алдагы көннәрдә дә бергә-бергә аңлашып эшләргә һәм яшәргә булсын!”, - дигән теләкләрен ирештерде Ленар Хантимиров.

Беренчеләрдән булып сәхнәдә Урта Балтай җирлеге урын алды. Алар Ибраһим Газиның “Югалган Мәрзыя” хикәясенә нигезләнеп эчтәлекле чыгыш әзерләгәннәр.

Татар авылында яшәүче ир белән хатын (ире тимер юлда эшли торган була) гаиләсен сугыш барган җирдән алып китеп баралар. Бара торгач Польша чигенә барып җитәләр. Бирегә дә фашистлар килеп җитә. Алар гади халыкны җәберлиләр, мыскыллап эшләтәләр. Матур кызларны җыеп алып китәләр. Мәрзыя (әлеге гаиләнең кызы) матурлыгын яшерү өчен үзенә кислота сибә. Аның куллары пешә. Битләрен буяп качып йөри. Соңгы чиктә авылдан чыгып китеп югала. Менә шушы күренешне җан өшеткеч итеп тасвирлап бирде балтайлылар. Чыгышлары патриотик рухтагы, спектакльнең эчтәлегенә туры китерелеп җырлар, биюләр белән үрелеп барды. Тамашачы күз яшьләре аша барысын да үзе аша кичерде. Авылдашлары Ранис Мусин башкаруында “Уф алла арбасы” җырына фашистларның халыкны мыскыллап эшләтүләре сәхнәләштерелде.

Авылдашларын хөрмәт итеп Татарстанның Халык артисты Илсур Сафин да кайткан иде. Ул Казандагы “Апас якташлык җәмгыяте” исеменнән Урта Балтай, Тутай, Кызылтау җирлекләренә бүләк тапшырды һәм җырларын бүләк итте. “День Победы” җырын бөтен зал басып тыңлады һәм алкышлады.

“Бүгенге эчтәлекле чыгышыбызның авторы һәм режиссеры үзебезнең авыл кызы Рамилә Вавилова. Җирлектәге барлык өлкә хезмәткәрләре, өлкән буын ветераннарыбыз бердәм булып чыгыш ясадылар. Барысына да олы рәхмәтемне җиткерәм. Киләчәктә дә бердәм булып эшләргә һәм яшәргә булсын!”, - диде Урта Балтай авыл җирлеге башлыгы Илфир Гәрәев.

Сәхнә түренә Тутай авыл җирлеге узды. Төп Ана ролендә авыл җирлеге башлыгы Наилә Насретдинова үзе уйнады.

Аларның чыгышларында яшьләрнең чыгарылыш кичәсе, мәктәпне тәмамлап кулына аттестат алган яшьләрнең киләчәккә хыяллары, мәхәббәтләре сугыш башлану хәбәре белән чәлпәрәмә килүе күрсәтелде. Ананың бер йорттан өч улын, хатыннарның ирләрен, балаларның әтиләрен сугышка озатулары, тылда халыкның хезмәт белән, сугыш кырында ирләрнең Җиңү китерүләре тасвирланды. Ананың ике улыннан үле хәбәре килүе, сугыш беткәч исән кайтуларын каршы алуларын тамашачы алкышлар белән каршы алды. Чыгышлары гармун моңнары, җыр-биюләр белән үрелеп барды.

“Тутай җирлегендә эшләп килүче хезмәткәрләр, авыл халкы, балалар белән бергә эчтәлекле чыгыш әзерләдек. Барысы да тырыштылар. Бигрәк тә балалар өчен тәрбияви чара дип саныйм. Киләчәктә ил-көннәребез тыныч булсын! Шатланып, бәхетле тормышта яшәргә язсын! Барлык катнашучыларыма олы рәхмәтем”, - диде авыл җирлеге башлыгы Наилә Насретдинова.

Кызылтау авыл җирлеге дә мәгънәле, эчтәлекле, тәрбияви чыгыш әзерләп килгән.

Авылдашлары Гомер бабай белән Шәехҗамал әби Әхмәтсафиннарның тормыш юлын чагылдырдылар. Әлеге үрнәк гаилә 10 бала тәрбияләп үстергәннәр.  Әби белән бабай бәхетле картлык көннәрендә сугыш чорын, авыр хезмәт иткән вакытларын искә алалар. Чыгышлар шулай ук җыр, биюләр белән үрелеп барды. Хәзерге көндә оныгының армия сафына китәргә җыенуын әби белән бабай хуплап, изге теләкләрен теләп озаталар. Патриотик рухта барган чыгышны халык бик яратып карады, җылы алкышлады.

“Җирлегебездә булган хезмәткәрләр, балалар белән әзерләп килдек чыгышны. Һәрбер катнашучыга олы рәхмәтемне ирештерәм. Сугыш чоры михнәтләрен сәхнәдә уйнарга гына калсын. Махсус хәрби операциядәге егетләребез дә исән-имин кайтсыннар иде”, - дигән теләкләрен ирештерде Кызылтау авыл җирлеге башлыгы Марат Нуриев.