Бүген Апаста яшәүче нәни Әмир белән Самир Хантимировларның иң шатлыклы тәүге бәйрәмнәре – туган көннәре

Әле кайчан гына Ленар Хантимиров белән Гөлназ Гатиятуллина кавышып яңа тормыш юлына аяк бастылар. 2012 елның 30 августында Апасны гөрләтеп туй үткәргән әти-әниләре Рәмзия һәм Тәлгать Хантимировлар, Фәнис һәм Мәдинә Гатиятуллиннар бар кунаклар алдында аларга ак юллар, ак бәхетләр теләделәр. Ходайның "Амин" дигән чагына туры килде әти-әниләр теләге-моннан нәкъ бер ел элек, 14 январьда яшь гаилә бәхетен тулыландырып, аларның игезәк балалары-Әмир белән Самир дөньяга килде!

Балалары шатлыгына иң күп сөенүче-аларның дәү әниләре, дәү әтиләре булды, әлбәттә.

Мәдинә Гатиятуллина әйтүенчә, аның тормыш иптәше Фәниснең әтисе дә игезәк сыңары булган. Тарих балаларда һәм оныкларда кабатлана икән, ди ул балалары шатлыгына сөенеп.

-Туган көннәре котлы булсын көтеп алган оныкларыбызның,-ди бәхетле дәү әниләр Мәдинә белән Рәмзия.

- Әти-әниләрен сөендереп, бәхетле, тәүфыйклы, иманлы һәм сау-сәләмәт булып үссенәр оныкларыбыз,-дип өсти игезәкләрнең дәү әтиләре Фәнис белән Тәлгать.

Хезмәт юлларын Апаста башлаган Ленар белән Гөлназга бездән дә теләкләрнең иң яхшылары гына!