Казанда һәлак булган Бөек Ватан сугышы Героеның бүләкләрен туганнарына тапшырдылар

(19нчы июнь, “Апастово-информ“).

Казанда 1945нче елда һәлак булган Бөек Ватан сугышы Герое Антон Шлыковның туганнарына Орден таныклыгы, бүләкләүне белдергән документлар тапшырылды.
Документларны Геройның кызына һәм оныгына Татарстанда Россия Федерациясе кабул итү бүлмәсендә Татарстанның хәрби комиссары, генерал-майор Сергей Погодин һәм республикабыз буенча баш федераль инспектор Виктор Демидов тапшырды.
Бүләкләү тантанасында, шулай ук, Татарстанның Хезмәт, мәшгульлек һәм социаль яклау министры Эльмира Зарипова да катнашты.
“Мин бүген сезнең белән аралаша алуыма һәм бүләкләрне үз кулларым белән тапшыра алуым белән бик горурланам. Бөек Ватан сугышында катнашучы әтиегез, дәү әтиегез мондый дәүләт бүләкләренә чын мәгънәсендә лаек“, - дип билгеләп үтте генерал-полковник Александр Лапин Антон Шлыковның кызына һәм оныгына мөрәҗәгать итеп.
Генерал-полковник Геройның кызына бүләкләрне ныклы исәнлек, озын һәм куанычлы гомер теләп тапшырды.
“Антон Шлыков Ватан сугышының беренче дәрәҗәдәге Ордены белән бүләкләнә. Ул 1945нче елны һәлак булган. Ул 1944нче елда, дошман пулеметчыларын юк иткәч, Кызыл Йолдыз Ордены белән бүләкләнергә тиеш булган, тик ул вакытта каты яраланган“, - дип сөйләде республикабызның хәрби комиссары Сергей Погодин.
Хәрби комиссар республикабызда Бөек Ватан сугышы Геройлары турындагы хәтерне саклап калу буенча зур күләмле эш алып барыла, дип ассызыклады. Татарстанлыларның 700 меңнән артык фамилияләре һәм 40 мең фотолары җыелган.
Бүләкләү тантанасыннан соң, Антон Шлыковның кызы әтисе турында онытмаулары өчен ихлас рәхмәтен белдерде.