Республикабыз Прокуратурасы үзизоляция режимын бозган өчен, ике кунакханә эшчәнлеген туктату буенча кисәтү ясады

(13нче май, “Апастово-информ”).

Республикабыз Прокуратурасы үзизоляция режимын бозучы ике кунакханә эшчәнлеген туктату мөмкинлеге турында кисәтте. Бу хакта “Татар-информ” матбугат агентлыгына Татарстан Республикасы прокурорының өлкән ярдәмчесе Руслан Галиев хәбәр итте.

Прокуратура хезмәткәрләре социаль челтәрләрдә “Корстон-Казань” һәм “Ривьера” кунакханәләренең аккаунтларында реклама тәкьдимнәренә игътибар иткәннәр. Әлеге рекламаларда үзизоляция режимы вакытында кунакханәләрнең үзләрендә күңел ачу чаралары үткәрү мөмкинлеге турында әйтелә.

Тикшерүләрдән соң, күзәтү ведомствосы ООО “Корстон-Казань” һәм “Отель Ривьера” җитәкчеләренә кисәтү ясады. Вазифалы затларны үзизоляция режимын бозган өчен, закон буенча җаваплылыкка тартылачакларын искәртеп үтте.