Апас аграр көллияте хезмәткәре Фирдүс Гәрәев 30 елдан бирле руль артында

(26 октябрь,“Апастово-информ“).

Фирдүс абый Апас урта мәктәбен тәмамлаганнан соң, һөнәр училищесына белгечлек алырга килә. Озакламый хезмәт юлын да биредә башлап җибәрә.

“Хезмәтемне башлаганда директорыбыз Рәшит Шәйхиевның тәэсире зур булды. Төгәллеккә, таләпчәнлеккә, эшне җиренә җиткереп эшләү серләренә ул өйрәтте. Бездә укып чыккан шоферлар инде үзләре тәҗрибәле хезмәткәрләр“, – диде ул.

Фирдүс Гәрәев студентларга йөк машинасында йөрү серләрен өйрәтә. Шул ук вакытта автобуста да хезмәт итә. Укучыларны укырга алып килү, өйләренә озату аңа йөкләнгән. Җәй көннәре исә комбайн руле артына утыра. Яшь буынны да үз үрнәгендә тәрбияли.

“Руль артындагы кешегә һәрчак уяу булырга кирәк. Шофер һөнәрен китаптан укып кына белеп булмый, аны күнекмәләр аша өйрәнеп, үз тәҗрибәңдә камилләштерсәң генә“, – ди остаз.