Апас тагын бер шәхесен югалтты

Зәки ага Галиуллин озак еллар хуҗалык җитәкчесе, җирле үзидарә рәисе, төзелеш оешмасы җитәкчесе булып эшләде. Ул хезмәт юлын, 1954 елда, Апас урта мәктәбен тәмамлаганнан соң, район халык судында секретарь булып башлый. Аннары районның социаль-тәэминат бүлегендә инспектор, Апас авыл Советы рәисе булып хезмәт итә. Аннан “Ватан“ колхозында партия оешмасы секретаре вазифасын башкара. 1966-1983 елларда “Спартак“ колхозын җитәкли.

Шушы елларда күп кенә уңышларга ирешә һәм СССР Югары Советы Президиумы Указы нигезендә Хезмәт Кызыл байрагы, “Хезмәттәге батырлыгы өчен“ медале белән бүләкләнә. “Татарстанның атказанган авыл хуҗалыгы хезмәткәре“ дигән мактаулы исемне дә шушы елларда ала.

1983 елда Зәки ага “ПМК-14“ оешмасына җитәкче итеп билгеләнә. 13 ел эчендә әлеге оешма тарафыннан газ линияләре, су юллары, юлларга дамбалар, күперләр, сусаклагычлар, асфальт юллар ясала, күлләр-чишмәләр чистартыла. Хезмәтләре өчен Зәки ага Галиуллин “Россиянең атказанган авыл хуҗалыгы хезмәткәре“ исеменә лаек була. Лаеклы ялга чыккач та, 5 ел дәвамында Апас җирле үзидарә Советы җитәкчесе булып эшли.

Зәки Мотыйгулла улы Галиуллинның туганнарының, якыннарының тирән кайгысын уртаклашыбыз. Аның якты истәлеге күңелләрдә мәңге сакланыр.