Апаска эш сәфәре белән Татарстан Республикасы Премьер-министрының беренче урынбасары Рөстәм Нигъмәтуллин килде

Эш сәфәре район башлыгы Айрат Җиһаншин белән берлектә Каратунда урнашкан сөт-май комбинаты, биредәге цехлар, эш мөмкинчелекләре белән танышудан башланды.
-Бүгенге көндә оешмада 37 кеше эшли. Эшне тулы күләмдә башкарып, киләчәктә 177 кешене хезмәт урыны белән тәэмин итәргә уйлыйбыз. Төп эш юнәлеше - ярым каты, каты сыр һәм майлы-майсыз коры сөт җитештерү. Март аенда оешманы эшләтеп җибәрергә уйлыйбыз, - ди сөт-май комбинатының башкарма директоры Дмитрий Самодоров.
Аннан кунаклар яңа гына төзекләндерү эшләре тәмамланган район үзәк хастаханәсенең балалар поликлинасына килделәр. Биредә 35 миллион сумлык эш башкарылган. Киләчәгебез булган – балаларга тиздән аерым бинада хезмәт күрсәтеләчәк.
-Бина яңа, якты, яңа җиһазлар белән баетылган. Биредә табибларга, шәфкать туташларына эшләр өчен барлык шартлар да тудырылган. 1 катында балалар консультациясе, икенчеседә - балалар бүлекчәсе булачак, - ди хастаханәнең баш табибы Алевтина Керимова.