Апасның Җәмигъ мәчетендә балалар өчен татар теле курслары ачылган

(24 октябрь, “Апастово-информ”)

Апасның Җәмигъ мәчетендә балалар өчен татар телен өйрәнү курслары эшли башлады. Курс программасы татар теленең сөйләм дәрәҗәсен өйрәнүгә һәм аралашу күнекмәләрне үстерүгә юнәлдерелгән. Биредә 10 бала шөгыльләнә. Дәресләрне тәҗрибәле татар теле һәм ислам дине нигезләре мөгаллимәсе Гөлчәчәк Төхвәтуллина алып бара. Район мөхтәсибе Мирхәт хәзрәт Җамалиев белдерүенчә, киләчәктә мондый укуларны өлкән яшьтәгеләр өчен дә оештыру планлаштырыла.