Апаста Бөек Ватан сугышы ветераннары һәм Ленинград камалышы шаһитлары Яңа ел котлаулары кабул итте

(29 декабрь, “Апастово-информ”).

Районда 3 Бөек Ватан сугыш ветераны, Ленинград камалышының тере шаһиты булган 2 кеше яши.

Тутайда яшәүче Галия апа Гыйззәтуллина Ленинград камалышта калган вакытта нибары 4 яшьлек була. Балачакның күңелсез хатирәләре гомер буе күңелендә яши. Бу хакта еш искә алырга яратмаса да, хатирәләр яңарып, күңеле тулган чаклар еш була.

“Бөтен шәһәрне шартлау тавышлары уятты. Әткәй-әнкәйләр елаша башлады. Ул вакытта ник елаганнарын да аңламаганбыз инде. Исән-сау калып, 1942 елда авылга кайтып егылдык. Товар ташый торган вагонга утырып, 1 ай юлда булдык. Әти безне озатып калды. Үзәккә үтеп калган ачы вакыйгалар еш искә төшә”, - диде ул бүләкләрне тапшырган тагын бер кат үткәннәргә сәяхәт итеп.