Балалар өчен түгәрәкләр тулы күләмдә эшләячәк

(31 август, “Апастово-информ”).

Балалар өчен түгәрәкләр һәм секцияләр эшендә чикләүләр юк. Бары тик, кайбер таләпләр кала. Өстәмә белем учреждениеләренә аларны үтәргә туры киләчәк. Бу хакта Казан Мэриясында узган дүшәмбе киңәшмәсендә Роспотребнадзорның Татарстан буенча идарәсе җитәкчесе Марина Патяшина белдерде.
“Өстәмә белем бирү оешмалары барлык профилактика чараларын җитди үтәргә тиешләр һәм безгә үзләре эшли башлауга бер көн калганчы, хәбәр итәргә мәҗбүрләр” - диде Патяшина.
Татарстанда коронавирус буенча чикләүләрне юкка чыгаруның өченче этабы гамәлгә керде. Барлык мәгариф системасы эшли башлады. Беренче сентябрьдән Татарстандагы барлык балалар өчен уку елы башлана.
Патяшина билгеләп үткәнчә, 100 кешедән артык булган урамдагы чаралар тыела. Ә бинада берүк вакытта 50 кешедән артык булмаска тиеш.