Беренче яшь гаиләгә яңа Президент программасы буенча фатир бирелде

(24 август, “Апастово-информ“).

Нуриевлар Татарстан Президенты Рөстәм Миңнеханов инициативасы белән яшь гаиләләр өчен яңа социаль ипотека программасы нигезендә фатир алдылар.
Татарстан Республикасы Президенты әлеге программаны бер ай элек игълан иткән иде. Рөстәм Миңнеханов фикере буенча, әлеге программа балалы гаиләләр өчен дә, бала табарга ниятләүче гаиләләр өчен дә зур ярдәм булачак.
Монардан тыш, әлеге программа республикабызда яшәргә һәм эшләргә планлаштыручы яшь белгечләр өчен дә бик мөһим.
Нуриевлар - яңа Президент программасы нигезендә торак алган беренче гаилә. Алардан соң 800 яшь гаилә җирле башкарма комитетларга теркәлү өчен мөрәҗәгать иткәннәр. Аларның 10сы инде Дәүләт торак фонды реестрына кертелгән, калганнары карау этабында.
Моңа кадәр Нуриевлар арендага алынган фатирда яшәгәннәр. Алар күптәннән үз йортларын сатып алырга хыялланганнар, ләкин, бюджет оешмасында эшләмәгәнгә, алар ташламалы бәя белән фатир сатып алуга өметләнә алмаганнар. Яңа программа аларга мондый мөмкинлекне бирде. Гаилә август башында теркәлү узган. Шуннан соң, фатир бәясенең 5%ын түләгәч, ай ахырында зур, 4 бүлмәле фатирына күченде.
“Үз фатирыбызны сатып алырга күптән хыялландык, ләкин, мөмкинлек чыкмады. Социаль челтәрләр аша яңа социаль кредит программасы барлыгын белдек һәм кызыксына башладык. Башта без күпфункцияле үзәккә бардык, кирәкле документлар исемлеген алдык һәм тиз арада җыя башладык, - ди Зөһрә Нуриева, - Рөстәм Нургалиевич Миңнехановка социаль программа шартларын киңәйткән өчен рәхмәт әйтәсе килә. Яшь гаиләләр өчен бу зур мөмкинлек. Без бик бәхетле. Хыялларыбыз тормышка ашты“.