Чирмешәннән Нурия әби Бәширова: “Аякта чабата, үзебез ачлы-туклы булсак та, сер бирмәдек”

(13 март, “Апастово-информ”).

Нурия әбигә район башлыгының котлауларын һәм бүләкләрен Ринат Гыйльфанов, Чирмешән авыл җирлеге башлыгы Айрат Зиннәтуллин тапшырды.
Нурия әби колхозның төрле хезмәтләрен башкарган. Тормыш иптәше белән бергәләп 5 бала тәрбияләп үстергәннәр. Ул бүген акъәби булып, балаларының, кияү, киленнәренең, онык-оныкчыкларының игелеген күреп яши.
“Яшьлегебез авыр чорга туры килде. Аякта чабата, үзебез ачлы-туклы булсак та, тырышып эшләдек, сер бирмәдек. Хәзер тамагыбыз тук, өстебез бөтен”, - ди Нурия әби.
Үз аякларында йөри, зиһене әйбәт, акылы камил әле Нурия әбинең. Балалары кайтканда чәйләрен кайнатып куя, ашлар да пешерә. Изге догаларыннан аерылмыйча, ил-көнгә иминлек, якыннарына хәерле гомерләр теләп яши.