Эшсезләргә актуаль вакансияләр!

(25 июль, “Апастово-информ”).

ТРның Хезмәт, мәшгульлек һәм социаль яклау министры Эльмира Зарипова Андрей Кузьминга биргән әңгәмәсендә эшсезләр өчен тәкъдим ителгән актуаль вакансияләрне атады.

“Төзелеш туктатылмаган. Анда ярдәмче эшчеләр генә дә 1,5 мең кеше таләп ителә. хезмәт хакы да 70 меңгә кадәр. Электрогазосварщиклар, бетон ясаучылар, арматурачылар, монтажчылар кирәк”, - диде Зарипова.
Транспорт тармагына да эшчеләр җитми. Татарстанның зур шәһәрләрендә 1000гә якын җәмәгать транспорты йөртүчесе җитми. Шулай ук 700ләп кондуктор кирәк.

“Алар өчен хезмәт хакы да республикадагы уртача күрсәткеч дәрәҗәсендә - 36-37 мең сум тирәсе. Ә транспорт тармагында 40 мең сумга кадәр”, - дип өстәде министр.

Сәүдә үзәкләре ачылганнан соң, Татарстанда сатучылар, склад эшчеләре җитми башлады.
“2009нчы елда 60000 эшсез бар иде. 9 эшсезгә бер эш урыны тәкъдим ителде. Ул елларда бездә вакансияләр җитмәде. Ә бүген инде тәкъдимнәр бар. Дөрес, хәзер дә вакансияләр җитәрлек түгел. Ләкин, тәкъдимнәр бит бар. Бу килеп туган хәлгә позитив карарга мөмкинлек бирә”, - дип сөйләде министр.
Зарипова сүзләренә караганда, эшсезлек үсү темпы кимегән.

Министр белән әңгәмәне “Татар-информ”ның YouTub каналында һәм шимбә көнне 18 сәгать 30 минутта, якшәмбе көнне 13 сәгать 30 минутта “Андрей Кузьмин белән галстуксыз әңгәмә” дигән тапшыруда карарга мөмкин.